कात्तिक २२ शुक्रबार २०७६
काठमाण्डौ —हरिबोधिनी एकादशी एउटा महत्वपूर्ण एकादशी हो, यस एकादशीलाई यसको महिमाका कारणले पनि सबैभन्दा ठूलो अर्थात ठूली एकादशी पनि भन्ने गरिन्छ । आजको दिन भगवान विष्णुप्रति समर्पित दिन हो, आजको दिन नै हरिशयनी एकादशीबाट चिर निन्द्रामा सुत्नुभएका विष्णु भगवान उठ्नुहुन्छ भन्ने जनविश्वाश रहेको छ ।
पद्म पुराणमा बिन्दा देवी ले पृथ्वी मा आएर भगवान बिष्णु लाई आफ्नो पति रुपमा पाउन गरेको तपस्यासंग तुलसीको महत्व लाई गासिंएको पाइन्छ । त्यही तुलसी संग बिष्णुको प्रतिकको रुपमा बाँस वा निगालो राख्ने गर्छन ।
गाउँघरमा धेरैजसो प्रयोग हुने निगालो शहरबजार अर्थात राजधानीमा अरु समयमा खास्सै देखिदैन,तर हरिबोधनी एकादशीको दिन भने निगालोको ब्यापार निक्कै उच्च रहेको काभ्रेका प्रिन्स तामाङले बताउनुभयो । अरु बेला काठमाण्डौमा कसैले निगालो खोज्दैन तर आजको दिन भने निगालोले महत्व र मुल्य दुबै पाउने तामाङको भनाई छ ।
पशुपति नजिकै निगालो ब्यापार मा ब्यस्त देखिनुभएका प्रिन्स तामाङ एउटा निगालोको ३० रुपैयाँ र फुल संगैको मुठा बनाएको निगालो १२० रुपैयामा बेच्दैहुनुहुन्थ्यो । उमेरले २२ बर्षे कलिलो उमेर तर आफुले सानै उमेरमा धेरै कामहरुको अनुभब गरेको सुनाउनुभयो ।
काभ्रे बाट दुई ट्रक निगालो लिएर काठमाण्डौ बेच्न आउनुभएका तामाङ, अनुभबले निक्कै कुरा सिकाउने बताउनुहुन्छ । बिहानदेखि निगालो बेच्न बस्नुभएका उहाँले ५० हजारको निगालो बेचिसक्नुभएको थियो ।
किन्ने मानिसहरु पनि उत्तिकै भिड लागेको देखिन्थ्यो । उहाँ भन्नुहुन्छ “सबै कुराको समय आउछ, नत्र गाउँमा यत्तिकै खेर गैरहेको निगालो आज मैले याहाँ सम्म ल्याएर बेच्दा आफुलाई राम्रो फाईदा भयो, बुवा आमाले दुख हुन्छ नलानु भन्नुहुन्थ्या मैले ल्याएर बेचिसके पैसा पनि टन्नै कमाए खुसि छु” ।
मुस्कुराउदै भन्नुहुन्छ “निगालो बेचेर कमाएको पैसाले आफुले चाहेको कुनै चिजमा लगानी गर्छु तर यहि कुरामा भन्ने चाही भाको छैन”
